Announcements | Pakistan Politics

پشاور میں سنسان علاقوں سے لے کر حساس ترین مقامات پر بھی دھماکے ہوچکے ہیں

صوبہ سرحد کے مرکزی شہر پشاور میں حالیہ بم دھماکوں اور خودکش حملوں نے جہاں شہریوں کو دہشت زدہ کردیا ہے وہاں شہر کے تمام بازار اور سڑکیں بھی سنسان ہوگئی ہیں اور ہر طرف خوف اور بے یقینی کی فضا ہے۔

سنیچر کو کئی دنوں کے بعد جب پشاور صدر میں داخل ہوا تو بازار کچھ بدلا بدلا سا نظر آیا۔ پہلے بازار کے وسط سے گزرنے والی صدر روڈ کے دونوں جانب فٹ پاتھ کے قریب گاڑی کھڑی کرنے کی جگہ نہیں ہوتی تھی لیکن آج وہاں تمام جگہیں خالی نظر آئیں۔

پہلے صدر میں ٹریفک پولیس کے اہلکار ہر وقت مستعد نظر آتے تھے اور اگر کوئی گاڑی غلط جگہ پارک ہوتی تو اسے ’ایلی ویٹر‘ میں اٹھاکر ڈرائیور کو جرمانہ کیا جاتا تھا، لیکن آج نہ تو گاڑیاں تھیں اور نہ ہی ٹریفک پولیس کے اہلکار۔ بازار میں دکانداروں نے اپنی دکانوں کے سامنے گاڑیوں کی پارکنگ کی جگہ پر رسیاں لگائی ہوئی ہیں تاکہ کوئی وہاں گاڑی کھڑی نہ کر سکے۔

یہ احتیاطی تدابیر بظاہر بڑھتے ہوئے کاربم اور خودکش حملوں سے بچنے کےلیے کی جارہی ہیں۔ یہی کچھ دیگر اہم بازاروں خیبر بازار اور قصہ خوانی میں بھی نظر آیا۔ یہ شہر کے ایسے مقامات ہیں جہاں پہلے صبح سے لے کر شام تک روایتی رش اور چہل پہل رہتی تھی۔ بالخصوص جب سے قبائلی علاقوں اور مالاکنڈ ڈویژن میں فوجی کارروائیاں شروع کی گئی ہیں تو مرکزی شہر ہونے کے ناطے پشاور میں غیر معمولی رش دیکھنے میں آتا تھا اور سڑکوں پر گاڑیوں کی جگہ نہیں ہوتی تھی۔ لیکن اب ان سڑکوں اور بازاروں میں کم کم گاڑیاں اور لوگ نظرآتے ہیں۔

شہر میں امن وامان کی تیزی سے بگڑتی ہوئی صورتحال کا اندازہ اس بات سے بھی لگایا جاسکتا ہے کہ آج کل لوگ بلا ضرورت بازاروں اور رش والوں جگہوں پر جانے سے گریز کررہے ہیں۔

شہر کے پارک اور تفریحی مقامات بھی خوف و ہراس کی وجہ سے ویران پڑے ہوئے ہیں۔

پشاور میں چند دنوں سے حملہ آوار ایک نئے طریقہ کار کے تحت نہایت دیدہ دلیری سے حملے کررہے ہیں۔ جس طرح پرفائیو سٹار ہوٹل (پرل کانٹینٹل) میں حملہ آوروں نے پہلے فائرنگ کی اور سکیورٹی حصار توڑ کر ہوٹل کے اندر جاکر حملہ کیا، بالکل ایسا ہی طرح رنگ روڈ پر ہونے والے دو دھماکوں میں بھی کیا گیا

گزشتہ ڈیڑھ ماہ کے دوران شہر کے سنسان علاقوں سے لے کر حساس ترین اور سخت سکیورٹی والے مقامات پر بھی دھماکے ہوچکے ہیں۔

جمعرات کی رات شہر کے نسبتاً دور اور غیر مصروف علاقے رنگ روڈ پر پولیس موبائل کو نشانہ بنایا گیا جس کے فوراً بعد ایک مبینہ خودکش حملہ بھی ہوا ۔ اس علاقے میں اس سے قبل بھی کئی حملے ہوچکے ہیں۔

اس دھماکے کے تقریباً ایک گھنٹے بعد شہر کے انتہائی حساس اور اہم علاقے خیبر روڈ پر کورکمانڈر پشاور کی رہائش گاہ کے قریب تقریباً ایک گھنٹے تک فائرنگ کا سلسلہ جاری رہا جس سے شہر میں شدید خوف وہراس پھیل گیا تھا۔ یہ وہ علاقہ ہے جہاں قریب وزیراعلی سرحد اور گورنر سرحد کے دفاتر اور رہائش گاہیں واقع ہیں۔ اس کے علاوہ اس علاقے میں ہائی کورٹ، سپریم کورٹ کی سرکٹ بینچ، ماتحت عدالتیں، صوبائی اسمبلی کی عمارت ، صوبائی وزراء کے دفاتر اور درجنوں دیگر محکموں کے دفاتر قائم ہیں۔

اس سے بظاہر یہ بھی محسوس ہوتا ہے کہ عسکریت پسند انتہائی اقدام پر اتر آئے ہیں اور ان کی کوشش ہے کہ حکومت پر کسی طریقے سے دباؤ بڑھایا تاکہ عسکریت پسندوں کے خلاف جاری کارروائیاں روکی جاسکیں۔

اس سے یہ اندازہ بھی ہوتا ہے کہ بظاہر عسکریت پسندوں کو سکیورٹی فورسز کی طرف سے شدید دباؤ کا سامناہے۔ آج کل طالبان کے اہم کمانڈر میڈیا سے بات کرنے سے بھی گریز کررہے ہیں اور خودکش یا دیگر حملوں کی ذمہ داری بھی دوسرے درجے کے کمانڈر قبول کررہے ہیں۔

اگرچہ ایک طرف شہر میں حالات روز بروز بگڑتے جارہے ہیں تو دوسری طرف اگر دیکھا جائے تو پشاور پولیس کے اہلکار فرائض کے دوران مستعد نظر آرہے ہیں اور پہلے کے مقابلے میں ان کا موروال بھی کافی بلند لگ رہا ہے۔ اگرچہ پشاور میں ہونے والے دھماکوں میں سب زیادہ قربانی پولیس اہلکاروں نے ہی دی ہے۔

شہر کے تمام داخلی اور خارجی راستوں پر سکیورٹی انتہائی سخت ہے۔ اس سے پہلے دس بارہ سالوں کے دوران ایسی سکیورٹی دیکھنے میں نہیں آئی تھی۔ پولیس اہلکار چیکنگ کے دوران کسی سے کوئی نرمی نہیں برت رہے ہیں بلکہ ہر شخص کو اہم علاقے میں داخل ہونے سے پہلے اپنی شناخت ضرور کرانی پڑتی ہے ، چاہے وہ کتنا ہی بڑا افسر کیوں نہ ہو یا عام آدمی۔ بلکہ آجک ل اگر اپ کے پاس شناختی کارڈ یا اور کوئی بزنس کارڈ نہ ہو تو اپ گاڑی سمیت صدر یا کسی اور حساس علاقے میں داخل ہی نہیں ہوسکتے۔ یہ بھی دیکھا گیا ہے کہ اس سلسلے میں لوگ پولیس اور قانون نافذ کرنے والے اداراوں سے تعاون بھی کررہے ہیں۔